*అక్షరలిపి కొరకు*
*అంశం :⁠- జూన్ రెండున తెలంగాణ అవతరణ దినోత్సవం.*
*తేది:⁠- 01/06/2025*


తెలంగాణ అమరుడు అయిన సిరిపురం యాదయ్య ,
తెలంగాణ మలిదశ ఉద్యమంలో తన ఆత్మార్పణతో అమరుడయ్యాడు. అతని త్యాగం తెలంగాణ రాష్ట్ర సాధన ఉద్యమానికి మరింత ప్రేరణనిచ్చింది.

సిరిపురం యాదయ్య 1991లో రంగారెడ్డి జిల్లా (ప్రస్తుతం రంగారెడ్డి జిల్లాలోని మహేశ్వరం మండలం) నాగారం గ్రామంలో జన్మించాడు.
చిన్నతనంలోనే తల్లిదండ్రులను కోల్పోయి అనాథగా పెరిగాడు. అనాథాశ్రమంలో ఉంటూనే చదువుకున్నాడు. ఇంటర్మీడియట్ చదువుతుండగా పార్ట్‌టైమ్‌గా రెస్టారెంట్లలో పనిచేస్తూ, వచ్చిన డబ్బుతో అనాథాశ్రమంలోని ఇతర పిల్లలకు బట్టలు, పుస్తకాలు కొనిచ్చేవాడని చెబుతారు.

2010 ఫిబ్రవరి 20న ఉస్మానియా యూనివర్సిటీ విద్యార్థులు "చలో అసెంబ్లీ"కార్యక్రమానికి పిలుపునిచ్చారు. ఈ కార్యక్రమానికి తెలంగాణ నలుమూలల నుంచి విద్యార్థులు భారీగా తరలివచ్చారు. ఉస్మానియా విశ్వవిద్యాలయం గేటు వద్ద పోలీసులకు, విద్యార్థులకు మధ్య తీవ్ర ఉద్రిక్తత చోటు చేసుకుంది. పోలీసులు అడ్డుకోవడంతో విద్యార్థులు పోలీసు గో బ్యాక్ అంటూ నినాదాలు చేస్తూ ముందుకు దూసుకెళ్లారు.

ఈ ఉద్రిక్త పరిస్థితుల మధ్య, ఉస్మానియా యూనివర్సిటీలోని ఎన్.సి.సి. గేట్ వద్ద సిరిపురం యాదయ్య తన ఒంటిపై కిరోసిన్ పోసుకుని **"జై తెలంగాణ"** అంటూ నినాదాలు చేస్తూ నిప్పంటించుకున్నాడు. తీవ్ర గాయాలతో అతడిని ఆసుపత్రికి తరలించగా, చికిత్స పొందుతూ కన్నుమూశాడు.

అతని బ్యాగ్‌లో దొరికిన సుసైడ్ నోట్‌లో, "చిన్నతనంలోనే తల్లిదండ్రులను పోగొట్టుకున్న ఓ అనాథను నేను. అనాథాశ్రమమే నాకు అన్నీ నేర్పింది. ప్రత్యేక తెలంగాణ కోసం కొన్నేండ్లుగా పోరాటాలు జరుగుతున్నయ్. వందల మంది ప్రాణాలు కోల్పోతున్నరు. తెలంగాణ కోసం నేనంటూ ఏదో చేయాలి! నా ఆత్మార్పణతోనైనా ఓ ముందడుగు పడుతుందని ఆశిస్తున్నాను" అని రాసి ఉన్నట్లుగా సమాచారం.

సిరిపురం యాదయ్య ఆత్మార్పణ తెలంగాణ ఉద్యమంలో మరో కీలక ఘట్టం. అతని బలిదానం విద్యార్థులు, యువతతో పాటు యావత్ తెలంగాణ ప్రజలలో ఉద్యమ స్ఫూర్తిని మరింత రగిలించింది. శ్రీకాంతాచారి ఆత్మార్పణ తర్వాత, యాదయ్య త్యాగం ఉద్యమానికి మరింత వేగాన్ని, ఉధృతిని తెచ్చింది. పోలీసులు, ప్రభుత్వం ఎంత నిర్బంధించినా, తెలంగాణ కోసం ప్రాణాలు వదలడానికైనా సిద్ధమేనని ఉద్యమకారులకు, ప్రజలకు అతని త్యాగం సందేశమిచ్చింది.

తెలంగాణ రాష్ట్ర సాధనలో సిరిపురం యాదయ్య త్యాగం చిరస్మరణీయం. తెలంగాణ ప్రభుత్వం అతని త్యాగాన్ని గుర్తించి, బడంగ్ పేట్ మున్సిపల్ కార్పొరేషన్ క్రీడా మైదానానికి అతని పేరును పెట్టి గౌరవించింది. ప్రతి సంవత్సరం అతని వర్ధంతిని తెలంగాణ వ్యాప్తంగా ఘనంగా నిర్వహిస్తారు.


*మాధవి కాళ్ల..*
*హామీ పత్రం :⁠-*
                      *ఈ ఇది సేకరణ అని హామీ ఇస్తున్నాను..*