ఎడారియే పూదోటని నమ్మలేము ఎన్నటికీ
బజారులో అంతరాత్మ అమ్మలేము ఎన్నటికీ

మంటనైన ముట్టుకునే పసిపాపల ధైర్యాన్నీ
బుద్దొచ్చిన పెద్దల్లో వెదకలేము ఎన్నటికీ

సంకెళ్ళే స్వాతంత్ర్యం తలుపు తీయ వచ్చూ
వలలువేసి వాగుగొంతు నులమలేము ఎన్నటికీ

ఆగ్రహం ఆవేదన అదుపులేని పదమైతే
ముక్కలైన వాక్యాన్ని అతకలేము ఎన్నటికి

కత్తి పదును తెగిన తలల లెక్కకేమి తెలుస్తుందీ
ప్రశ్నించే మెడల తెగువ కొలవలేము ఎన్నటికీ

జ్ఞాపకాల చిరుగాలై సౌందర్యం వీస్తుంటే
గుండెల్లో తుఫానులను ఆపలేము ఎన్నటికీ

పరిమళాల చిరుస్పర్శలు అలవోకగ వాలితే
అలుముకునే దియ రూపం చెరపలేము ఎన్నటికీ..

*✍️ గంధం గురువర్ధన్ రెడ్డి*

*కన్నీటి చినుకు*

మనసులోని ఆవేదన
విశ్వమంత విస్తరించినా
కన్నీటి బొట్టుగా రాలిపడితేనే
గుండె బరువు తగ్గేది!
ఒక్కో బొట్టూ
వెచ్చని అడుగులేస్తూ
ఓదార్పు తీరం చేరి
మౌనంగా ఇంకిపోవును!
మౌనం మొలకెత్తుతుంటే
శూన్యపుతీగలు
దేహమంతా అల్లుకుపోతాయి!
జీవితం చీకటిఖైదీ కాకముందే
వెలుతురుహస్తం తోడై
స్వేచ్ఛాగీతిక పలికించాలి!

గులాబికేం తెలుసు
గుచ్చుకునే ముల్లు బాధ,
ముల్లుకేం తెలుసు
వాడిపోయే గులాబీ బాధ!
అందమైనవన్నీ తాత్కాలికమే
పొందలేనివన్నీ విషాదమే!
వికసించేది ఒక్కరోజైనా
పరిమళం జీవితాంతం,
కుమిలిపోయేది క్షణమైనా
అంతమయ్యేది జీవనం!
చినుకులుగా రాలే కన్నీళ్ళు
సముద్రమంత లోతును చూపిస్తాయి!
మిణుగురులుగా వెలిగే ఆనందాలు
వెన్నెలలాంటి జీవితాన్ని చూపిస్తాయి!
*✍️ గంధం గురువర్ధన్ రెడ్డి*

*సృష్టి రహస్యం*

మూడు రోజుల్లో ముల్లోకాలు కనపడతాయి
కనిపించని హార్మోన్లు సతమతమవుతాయి
లోపల పేగులన్నీ చుట్టుకుని
రక్తమంతా ముక్కలవుతుంటే
పసిపాప అమ్మా అంటూ పొట్ట చేతపట్టి
మెలికలు తిరుగుతుంటే
వరమనుకోవాలో శాపమనుకోవాలో
తెలియని జీవితాలు మావి

విధించిన సుంకాలకు
రక్తపుటేరులై ప్రవహిస్తున్న
ఆత్మాభిమానానికి
ఏ అడ్డుకట్ట వేస్తారు..?
సృష్టి రహస్యాన్ని ఏ రికార్డుల్లో
పొందు పరుస్తారు..?
మగువ సురక్షిత జీవితానికెప్పుడు
నాంది పలుకుతారు..?
నిన్నటి పొద్దులో కుంగిన సూర్యుడు
నేటి దినకరుడు కాడా..?
పొగిలి పొగిలి ఏడ్చినా తీరని ఆవేదన మాది
రుతురాగాలకు జతకలిసే తొలిపొద్దులం
గమ్యమెరుగని నిరంతర శ్రామికులం

ఇన్నాళ్ళు హక్కులన్నీ కొల్లగొట్టి
మూలన కూర్చోబెట్టింది చాలు
మాసంలో మూడు రోజులు
సెలవు దినాలు లేని మమ్ము
ప్రకటనల పేర బూతు బొమ్మను చేశారెప్పుడో
బాత్రూముల్లో ప్రవహించే రక్తపుటేరులను
చూడగలిగే దమ్ముందా...!?

సృష్టి రహస్యమే దాగుంది అందులో
వ్యాపార ప్రకటనలకు వాడుకుంది చాలిక..!
సృష్టి రహస్యానికి రేటు కట్టి
గర్భకోశాలకు చిల్లులు పెట్టకండి
చరిత్ర హీనులుగా మిగిలిపోకండి...
*✍️ గంధం గురువర్ధన్ రెడ్డి

* నువ్వు కళ్ళు తెరువొద్దు *

రాత్రులన్నీ రాక్షసత్వాన్ని
ఒంటి మీద చల్లుతున్నవి
భరతమాతా నువ్వు కళ్ళు తెరువకు
ఈ భారతదేశంలో మనుషులు చచ్చిపోయి
మర్మాంగాలు నిలబడుతున్నవి.

ఇక్కడ మనుషులకంటే లేచి నిలబడిన మర్మాంగాలు మాత్రమే బ్రతుకుతున్నాయ్!
నువ్వెందుకు కళ్ళుతెరువలేకపోతున్నావో...
నువ్వెంత అవస్ధపడుతున్నావో...
ఇప్పుడర్ధమైంది!
స్వతంత్రం దేశానికి మాత్రమే ఒచ్చింది
నీకు మాకు కాదు!

నడివీధిలో అమ్మతనం
మర్మాంగాలలో చచ్చిపోతోంది!
న్యాయానికే కళ్ళుపోయినపుడు
స్వతంత్రం ఒచ్చిన భారతదేశం
నీ రొమ్ముల్లో చిక్కుకొని
ఎప్పుడో చచ్చిపోయింది!

ఈ కామాంధుల లోకం
కళ్ళ నిండా కామాల బీజాలు
మొలిపించ్చుకుంటున్నారు!
అమ్మ లక్ష్మి , పార్వతి
మిమల్ని నెత్తిమీదుంచుకొని
గుండెల్లో దాచుకున్న
మీ మగాళ్లను అడగండమ్మా
ఇక్కడ ఆడపిల్లలు ఎంత అవస్థపడుతున్నారో?

ఇక్కడ వీధులన్నీ...
సెక్స్ పరిమళాలే వెదజల్లుతున్నాయి!
మగాళ్ల చూపులన్నీ...
వయసుకు తేడాలేని
ఆడపిల్లల చున్నీల్లో చిక్కుకుంటున్నవి!

ఇక్కడ మగాళ్ల కళ్ళల్లో
మర్మాంగాలు మొలుస్తున్నాయ్!
నువ్వు అవస్థపడుతున్న
ఆ చూపులన్నీ నడిరోడ్డులో
మానభంగానికి గురవుతున్నాయి!

ఆడది ఎప్పుడైతే అర్ధరాత్రి బయిటికొస్తుందో... అప్పుడే స్వతంత్రం వస్తుందని చెప్పిన
మహానుభావుడి మాటలు నమ్మి
బయటికొస్తే ప్రాణాలు పోగొట్టుకుంటామని
ఆ పెద్దమనిషికి తెలియదేమో..?
అమ్మ నువ్వు ఎవరి మాటలునమ్మి
బయిటికి రావొద్దమ్మా...
ఇక్కడ మానవత్వం
శవాలు కాలిన వాసనలై గుప్పుమంటోంది!

ఇక్కడ హత్యలు చేయబడతాయి
పెట్రోలు , యాసిడ్ దాడులు జరుగుతాయి
మానభంగాలకు కొదువేలేదు
ఇవన్నీ జరిగిన అధికారాలన్నీ
నీ శీలానికి అమ్ముడుపోయనుకో...
అమ్మ ఎట్టి పరిస్థితిలో
"నువ్వు కళ్ళు తెరువొద్దు".!!
..*✍️ గంధం గురువర్ధన్ రెడ్డి*

నువ్వు కళ్ళు తెరవొద్దు