ఈ రోజు అంశం
నాలాంటి ఒకడు

శీర్షిక
నేనంటే నేనే.

నాలాంటి వాడు మరొకడు ఉండడేమో. నా వేలి ముద్ర
ఇంకొకరితో సరిపోల్చి చూడలేం . ఈ ప్రపంచంలో మనిషిని పోలిన మనుషులు ఆరుగురు ఉంటారు అని అందరూ
అంటుంటారు కానీ వారిని కలుసుకునే అదృష్టం ఎవరికీ
ఉండదు. ఒకే తల్లి కడుపున పుట్టిన కవల పిల్లలు ఒకే రూపుతో ఉండవచ్చు కానీ
వారి అలవాట్లు వేరుగా
ఉంటాయి. నేను నా చిన్నతనం నుండి ఇప్పటివరకు అనేక
విధాలుగా మారాను.
శారీరకంగా ఎదిగాను.
మానసికంగా కూడా
పరిపక్వత సాధించాను.
మంచి- చెడుల మధ్య
తేడాను గుర్తించి తదనుగుణంగా ముందడుగు వేస్తూ
పోతున్నాను. అలా
మార్పు చెందుతున్న
సంధర్భాలలో నేను
చాలా తప్పొప్పులు చేసి ఉండవచ్చు. తప్పుల నుంచి గుణపాఠం నేర్చుకొని
నలుగురికి చెప్పే స్థితికి చేరుకున్నా. నా జీవితాన్ని నేను సంతృప్తికరంగా గడపాలి అంటే
చాలా కష్టపడి పనిచేయాలి అని
గుర్తించా. ఆ విషయం
అందరికీ తెలిసిన నాడు
అందరూ విజయపథంలోకి అడుగులు వేస్తారు.

ఈ రచన నా స్వీయ రచన
వెంకట భాను ప్రసాద్ చలసాని

ఈ రోజు అంశం
మీ పిల్లలు తప్పు చేస్తే మీరేం చేస్తారు

శీర్షిక
సరిదిద్దే ప్రయత్నం చెయ్యాలి.

పిల్లలు తప్పు చేస్తే వారిని సరిదిద్దే ప్రయత్నం చెయ్యాలి.
వారికి సరైన మార్గదర్శకత్వం చెయ్యాలి. నేను నా ఇద్దరు
పిల్లలను ఇప్పటివరకు దండించలేదు. నా అబ్బాయి
చదువు పూర్తిచేసుకుని ఉద్యోగం చేస్తున్నాడు. వాడిని
నేనెప్పుడూ కొట్టలేదు. అలాగే
నా అమ్మాయి తొమ్మిదవ తరగతి చదువుతోంది. నేను
నా అమ్మాయిని కూడా ఎప్పుడూ కొట్టలేదు. చెప్పే
విధానంలో చెప్పితే వింటారు
అని నా నమ్మకం. వారిద్దరూ
తప్పులు చెయ్యలేదని కాదు.
చాలా తప్పులే చేసారు. ఆ
తప్పులను సరిదిద్దుకునే ప్రయత్నం వారే చేసారు.
సక్సెస్ సాధిస్తూ ఉన్నారు.
నా మాటే శాసనం అంటే
పిల్లలు వినరు. ఇలా చేస్తే
నీకు మంచిది అని చెప్తే
పిల్లలు వింటారు. చెప్పి
చూడండి. మీ పిల్లలు మంచి ఫలితాలు సాధించవచ్చు.

ఈ రచన నా స్వీయ రచన.
వెంకట భాను ప్రసాద్ చలసాని

నేటి అంశం
కార్తీక దీపం

శీర్షిక
సంవత్సరంలోని అన్ని మాసాలలో కార్తీక మాసం అతి విశిష్టమైన మాసం. కార్తీక మాసంలో ఈ రోజు అతి
పవిత్రమైన రోజు. అందుకే
మహిళామణులు తమ ఇళ్ళలో దీపారాధన చేసి
భగవదారాధన చేస్తారు.
భగవదనుగ్రహం కోసం
పూజలు చేస్తారు. శివపార్వతుల, లక్ష్మీ నారాయణుల అనుగ్రహం కోసం ఈ రోజు విశేష
పూజలు చేస్తారు. ఈ
రోజు ఉపవాసం ఉండి
భగవన్నామస్మరణ చేస్తే
పుణ్యం లభిస్తుంది అని
నమ్మకం. మితృలందరికీ
కార్తీక పౌర్ణమి సందర్భంగా
శుభాకాంక్షలు తెలియచేస్తూ
ఉన్నాను.

ఈ రచన నా స్వీయ రచన.
వెంకట భాను ప్రసాద్ చలసాని

ఈ రోజు అంశం
మీ బాల్యంలో జరుపుకున్న బాలల దినోత్సవ వేడుకలు

శీర్షిక
ఆ రోజులే వేరు

నా చిన్నతనంలో బాలల దినోత్సవం బహు చక్కగా
జరుపుకునేవారం. బాలల
దినోత్సవానికి వారం రోజుల
ముందు నుంచే రకరకాల సాంస్కృతిక కార్యక్రమాలకు
ఏర్పాట్లు జరగేవి. పిల్లలకు
పాటల పోటీలు, నృత్య
పోటీలు జరిగేవి. అలాగే
ఆటల పోటీలు జరిగేవి. ఆ
పోటీల్లో గెలుపొందిన వారికి
బాలల దినోత్సవం రోజున
బహుమతులు అందజేసి
ప్రోత్సహించేవారు. స్కూల్
రంగురంగుల కాగితపు పూలతో అలంకరించి
ఆనందించేవారం. అలాగే
నెహ్రూజీ గారి చిత్ర పటానికి
దండ వేసి నివాళులు అర్పించే
వారము. పిల్లలకు మిఠాయిలు
పంచబడేవి. మధ్యాహ్నం ఎవరి ఇళ్ళకు వారు వెళ్ళి
పోయేవారం. అంతకు ముందు ఒక సాంస్కృతిక కార్యక్రమం జరిగేది. పాటలు, నృత్యం
తదితర కార్యక్రమాలు జరిగేవి.
ప్రధాన అధ్యాపకులవారు తన
ఉపన్యాసం ఇచ్చేవారు. ఇలా
మా చిన్నప్పుడు బాలల దినోత్సవం జరిగేది. ఇప్పుడు
ఆ మధుర స్మృతులు గుర్తుకు
వచ్చినప్పుడు చాలా ఆనందం
కలుగుతుంది.

ఈ రచన నా స్వీయ రచన.
వెంకట భాను ప్రసాద్ చలసాని

ఈ రోజు అంశం

సోషల్ మీడియా పిచ్చి తగ్గాలంటే

శీర్షిక
మనిషిపై సోషల్ మీడియా ప్రభావం

ప్రతి మనిషిపై సోషల్ మీడియా ప్రభావం పడుతోంది. చాలా
సమయం వృధా అవుతోంది. మానసిక ఆరోగ్యం కూడా దెబ్బతింటోంది.
శారీరకంగా కూడా
ఇబ్బందులు పడుతూ
ఉన్నారు. ప్రపంచ
సమస్యలు అన్నీ
తన సమస్యలుగా
భావించటం వల్ల
ఆందోళన పెరిగి
డయాబెటిస్, రక్తపోటు
వచ్చే అవకాశం ఉంది.
వాస్తవ పరిస్థితిని పట్టించుకోకుండా
సోషల్ మీడియానే
తన ప్రపంచంగా జీవిస్తూ ఉన్నారు.
మరి ఆ పిచ్చి పోవాలంటే ఒకటే
మార్గం ఉంది. పని
ఉన్నప్పుడు సెల్
పక్కన పెట్టేయాలి.
ఖాళీ సమయంలో మాత్రమే సోషల్ మీడియా పైన
దృష్టి పెట్టాలి. ఏదైనా అతి చేస్తే చాలా ప్రమాదకరం. అందుకే
సోషల్ మీడియానే
జీవితంగా బ్రతుక కూడదు. వాస్తవ పరిస్థితిని అర్థం చేసుకుని తదనుగుణంగా ప్రవర్తిస్తూ ఉండాలి.

ఈ రచన నా స్వీయ రచన.

వెంకట భాను ప్రసాద్ చలసాని.