పల్లెటూరు జానపదుల నుండి
నవీన నాగరికుల వరకు ఆచరించే
తెలుగు సంవత్సరాది ఉగాది!
చైత్రశుద్ద పాడ్యమి నెలవంక పూయగా
ఎండల మంటల్లో అరుదెంచె పరాభవ నామ ఉగాది
చెట్లు పచ్చని చిగుళ్లు లేత పసుపురంగు పూతలతో
సింగారించుకున్న ప్రకృతి కన్యక!
గండుకోయిలల కుహు కుహూరవాలు
వేసంగి పంటకోయు కాలం అరుదెంచి
రైతులు కూలీలకు చేతినిండా పని
రామచిలుకలు తెల్లని కొంగలు స్ట్వైర విహారం!
శడ్రుచుల సమ్మిళితం ఉగాది పచ్చడి
ఆరు జీవనానుభూతుల సమ్మేళనం!
ఇంటిపెద్ద నాన్నగారే స్వయంగా తయారు చేసేను
ఇంటి ఇల్లాలు కళ్లల్లో వెలుగుల జ్యోతులు
పిల్లలందరు తలంటు స్నానం చేసి
చిన్నా పెద్దా ఉగాది పచ్చడినారగించి
అమ్మ చేసిన తీపి వంటకాలు
ఆనందాల ఆరగింపుల తర్వాత
గున్నమామిడి ఆకుల తోరణాల కింద పంచాగ శ్రవణం!
మండుటెండలకు చల్లచల్లని చలువ పందిళ్ళు
వింత వింత సోయగాల ఆనందడోలికలు
ఊరు ఊరంతా పండుగ వాతావరణం!
పేద సాద బీదవాళ్ళకు ఇళ్ళల్లో ఇల్లాళ్లు
తాము చేసిన వంటలను వాళ్ళకింత పంచిఇచ్చే మమకారం!
ఉగాది సరికొత్త కాంతుల దివ్యజ్యోతి!!
ఆపరాజిత్
సూర్యాపేట