కళ్లలో మెరిసే కలల సంతకం

అక్షర ప్రేమలేఖల కొరకు

అంశం :⁠- చిత్రం

తేది:⁠- 31/01/2026

శీర్షిక:⁠- కళ్లలో మెరిసే కలల సంతకం

ప్రియమైన నా ప్రేయసికి…

మన తొలి పరిచయం, ఆ క్షణాన నా మనసులో కలిగిన అలజడి మళ్ళీ గుర్తొస్తున్నాయి. లోకం తన వేగంతో తాను పరిగెడుతున్నా, నువ్వు నా ముందు నిలబడిన ఆ క్షణం మాత్రం కాలం ఆగిపోయినట్లు అనిపిస్తుంది. ఈ చిత్రంలో కనిపిస్తున్న ఆ జంటలాగే, మన మధ్య కూడా వెయ్యి మాటలు చెప్పలేని భావాలను ఒక చిన్న చూపు పంచుకుంటోంది.

నీ కళ్లలోకి చూడటం అంటే… ఒక ప్రశాంతమైన సముద్రంలోకి తొంగి చూడటం. అందులో అలజడి లేదు, కేవలం అనంతమైన ప్రేమ మాత్రమే ఉంది. ఈ చిత్రంలో ఆ యువకుడు తన ప్రియురాలిని ఎంతటి ఆరాధనతో చూస్తున్నాడో, నా ప్రతి అడుగులోనూ, నా ప్రతి ఆలోచనలోనూ నిన్ను అంతకంటే మిన్నగా ఆరాధిస్తున్నాను. నీ చూపు నాలోని భయాన్ని పోగొట్టి, ఒక కొత్త ధైర్యాన్ని ఇస్తుంది.

నువ్వు తలకు ధరించిన ఆ ముసుగు నీ అందాన్ని రెట్టింపు చేయడమే కాదు, నీలోని హుందాతనాన్ని, సంప్రదాయం పట్ల నీకున్న గౌరవాన్ని చాటిచెబుతోంది. నీ నవ్వులో ఒక పవిత్రత ఉంది. ఆ పవిత్రతే నిన్ను అందరిలోకి ప్రత్యేకంగా నిలబెడుతుంది. నీతో గడిపే ప్రతి నిమిషం ఒక దైవ ప్రార్థనలా అనిపిస్తుంది.

ప్రేమ అంటే… కలిసి నడవడమే కాదు, ఒకరి మౌనాన్ని ఒకరు అర్థం చేసుకోవడం. మనం ఎదురెదురుగా నిలబడి ఒక్క మాట కూడా మాట్లాడుకోకపోయినా, మన హృదయాల చప్పుడు ఒకే రాగాన్ని ఆలపిస్తుంది. ఈ ప్రపంచంలో ఎన్నో అకర్షణలు ఉండవచ్చు, కానీ నీ మనసు ఇచ్చే ప్రశాంతత ఎక్కడా దొరకదు?

జీవితం అంటే ఎప్పుడూ పూల బాట కాదు? అప్పుడప్పుడు కష్టాల మేఘాలు కమ్ముకోవచ్చు, అనుమానాల తుఫానులు రావచ్చు. కానీ, మనమిద్దరం ఒకరినొకరు చూసుకుంటున్న ఆ నమ్మకం మనకు తోడుంటే… ఏ అడ్డంకినైనా అధిగమించవచ్చు? నీ అడుగులో నా అడుగు వేస్తూ, నీ ఆశయాలకు నా తోడ్పాటునిస్తూ, ఆఖరి శ్వాస వరకు నీ నీడలా ఉండాలని కోరుకుంటున్నాను.

నువ్వు నా జీవితంలోకి రావడం నేను చేసుకున్న అదృష్టం. నీ ప్రతిబింబం నా కళ్లలో ఎప్పటికీ ఇలాగే ఉండాలి? కాలం మారినా, రంగులు వెలిసినా మన ఈ ప్రేమ చిత్రం మాత్రం ఎప్పటికీ తాజాగా, వెలుగుతూనే ఉంటుంది.
నీ రాక కోసం, నీ ప్రేమాభిషేకం కోసం వేచి చూసే…

నీ కళ్లలో మెరిసే కలల సంతకం అయ్యే నీ సఖుడిని…

మాధవి కాళ్ల..
హామీ పత్రం :⁠-
                      ఈ లేఖ నా సొంతం అని హామీ ఇస్తున్నాను..