హృదయసఖీ

అక్షర ప్రేమలేఖల కొరకు
అంశం :⁠- చిత్రం
తేది:⁠- 03/02/2026
శీర్షిక:⁠- హృదయసఖీ…

ప్రియమైన నా హృదయసఖీ…

ఈ చిత్రం చూసిన క్షణమే నా మనసు ఎక్కడికో వెళ్లిపోయింది? నీలిరంగు ఆకాశంలా నిశ్శబ్దంగా ఉన్న నీ రూపం, చేతుల్లో నూలుదారాలతో నువ్వు అల్లుకుంటున్న ఆ సున్నితమైన క్షణం , ఇవన్నీ నా గుండెలో ఒక మధురమైన అలజడిని రేపాయి. నువ్వు అలా శాంతంగా కూర్చుని ఏదో నేసుకుంటూ ఉన్నావు కదా! అది బహుశా నా జీవితం కావచ్చేమో అనిపించింది. ప్రతి దారంతో నువ్వు అల్లేది నా కలలని, నా భావాలని, నా ప్రేమని అనిపించింది.

నీ ముఖంలో కనిపించే ఆ ప్రశాంతత నాకు ఎప్పుడూ కావాలి? జీవితపు తుపానుల్లో చిక్కుకున్నప్పుడు నీ జ్ఞాపకం ఒక నీడలా నన్ను చల్లబరుస్తుంది. ఈ చిత్రంలో నీ చుట్టూ తిరుగుతున్న గాలిలా నా ఆలోచనలు ఎప్పుడూ నీ చుట్టూనే తిరుగుతుంటాయి? నువ్వు వేసే ప్రతి కుట్టు నా గుండె మీద పడే ముద్దులా అనిపిస్తుంది. ఎంత అందంగా ఉంది నీ నిశ్శబ్దం? అది మాటలకన్నా గొప్పగా ప్రేమను చెప్పేస్తోంది.

నువ్వు ఇలా కూర్చుని ఏదో అల్లుకుంటూ ఉండగా, పక్కనే రాలిపోతున్న ఆ ఆకులు మన జీవితంలోని చిన్న చిన్న బాధల్ని గుర్తుచేస్తున్నాయి. కానీ నీ చేతుల తాకిడిలో అవన్నీ తేలిపోతాయి. నువ్వు నా జీవితంలోకి వచ్చిన తరువాతే నాకు తెలిసింది , ప్రేమ అంటే మాటలు కాదు, నిశ్శబ్దమైన సహవాసం అని. నీతో మాట్లాడకపోయినా, నీ పక్కన కూర్చుంటే చాలు, ప్రపంచమంతా నిశ్చలమైపోతుంది.

నీ ఒడుపు, నీ సహనం, నీ సౌమ్యత ఇవన్నీ నన్ను మరింతగా నీపై ప్రేమలో పడేస్తున్నాయి. నీ చేతుల్లోని ఆ దారాల్లాగే నా జీవితాన్ని కూడా నువ్వే ముడిపెడుతున్నావు. నువ్వు లేని నా రోజులు అర్థం లేని పుటల్లా అనిపిస్తాయి. నువ్వు నవ్వితే చాలు నా హృదయం పువ్వుల తోటలా వికసిస్తుంది.

ఎప్పుడైనా నిన్ను చూస్తే నాకు అనిపిస్తుంది? దేవుడు చాలా శ్రద్ధగా తీర్చిదిద్దిన కల్పన నువ్వని. నీ కళ్లలో కనిపించే మృదుత్వం, నీ నడకలోని సౌందర్యం, నీ మనసులోని స్వచ్ఛత ఇవన్నీ కలసి నిన్ను అపూర్వంగా మార్చాయి. ఈ చిత్రం చూసినప్పటి నుంచి నేను మళ్లీ మళ్లీ నిన్నే చూస్తున్నట్టు ఉంది. ప్రతి గీతలో, ప్రతి రంగులో నువ్వే కనిపిస్తున్నావు.
ప్రేమ అంటే ఏమిటో నేను ఎన్నో చోట్ల విన్నాను, ఎన్నో పుస్తకాల్లో చదివాను. కానీ నిజమైన ప్రేమను నేను నిన్ను చూసినప్పుడే తెలుసుకున్నాను. నువ్వు నా జీవితంలో ఒక శాశ్వతమైన భావనవు. నిన్ను చూసిన ప్రతిసారి నా లోపల కొత్త ఆశలు మొలకెత్తుతాయి. నువ్వు నాతో ఉంటే చాలు ప్రపంచంలో ఇంకేమీ అవసరం లేదనిపిస్తుంది?

ఈ లేఖను నేను మాటలతో రాస్తున్నాను గానీ, నా హృదయం మాత్రం నీ పేరునే పాడుతోంది. నువ్వు ఎక్కడ ఉన్నా, ఏ పని చేస్తున్నా, నా ప్రేమ నీకు ఎప్పుడూ తోడుగా ఉంటుంది? ఈ చిత్రంలో కనిపిస్తున్నంత శాంతిగా, అందంగా, నిర్మలంగా మన ప్రేమ కూడా ఎప్పటికీ నిలిచిపోవాలని కోరుకుంటున్నాను.
నీకు తెలియకుండానే నువ్వు నా జీవితాన్ని ఒక అందమైన కళాఖండంలా మార్చేశావు. ఆ కళాఖండానికి నువ్వే ప్రాణం. ఎప్పటికీ నిన్నే ప్రేమిస్తూ, నిన్నే తలచుకుంటూ ఉండే
నీ ప్రేమతో…

ఎప్పటికీ నీకే చెందినవాడు…

మాధవి కాళ్ల..
హామీ పత్రం :⁠-
                      ఈ లేఖ నా సొంతం అని హామీ ఇస్తున్నాను..