నీ మైకంలో

అక్షర ప్రేమలేఖల కొరకు
అంశం :⁠- చిత్రం
తేది:⁠- 21/01/2026
శీర్షిక:⁠- నీ మైకంలో…

ప్రియమైన నా ప్రాణానికి…

ఈ రోజు కాలం నా కళ్లముందే స్తంభించిపోయింది. బయట ప్రకృతి మౌనంగా ఉందో లేక ఏదో రహస్యం చెబుతోందో అర్థం కావడం లేదు?
కానీ, నా మనసు మాత్రం ఒక వింతైన మైకంలో మునిగిపోయింది. ఆ మైకం మరేదో కాదు, నీ జ్ఞాపకాల మత్తు. ఈ లేఖ రాస్తున్నప్పుడు నా అక్షరాలు తడబడవచ్చు. కానీ , నా ప్రతి శ్వాస నీ నామమే జపిస్తోంది.

మనం కలుసుకున్న ఆ క్షణం నా జీవితంలో ఒక అద్భుత మలుపు. ఆ రోజు నీ కళ్లలోకి చూసినప్పుడు నాకు ఈ అనంతమైన విశ్వం కనిపించింది.
మన పరిచయం ఒక దైవిక సంకల్పంలా అనిపించింది. నీ చూపులో ఒక సమ్మోహనం ఉంది, అది నన్ను నాకే తెలియని ఒక మాయా లోకంలోకి తీసుకెళ్లింది. నీ ఆకర్షణ అనే అయస్కాంతం నన్ను నీ వైపు లాగుతుంటే…
నేను పూర్తిగా నీ మైకంలో చిక్కుకుపోయాను.

సంగీతం ఒక భాషలు లేని విశ్వ కావ్యం. వయోలిన్ నుండి జాలువారే ఆ మధురమైన స్వరాలు పొగ సుడులుగా మారి గాలిలో కలిసినట్లు, నా ప్రతి ఆలోచన నీ మాటలతో నిండిపోతోంది.
నువ్వు పలికించే ప్రతి పదం ఒక రాగమై నా హృదయాన్ని తాకుతోంది.
నేను నీ ధ్యాసలో నన్ను నేను మర్చిపోతాను. నీవు పలికించే ఆ ప్రణయ రాగం నా జీవితానికి ఒక సంపూర్ణత్వాన్ని ఇచ్చింది. ఆ రాగపు మైకంలో నేను పరవశించిపోతున్నాను.
ఆ క్షణపు మైకం ఇప్పటికీ నా కళ్లముందే కదలాడుతోంది.

నువ్వు ఒక అద్భుతం
నువ్వు ఒక కావ్యం
నువ్వు ఒక తీరని దాహం.
నీ ప్రేమ అనే మత్తులో
నేను బందీని కావాలని కోరుకుంటున్నాను.
ఈ ప్రపంచంలో నాకు ఏ సంపదా వద్దు, కేవలం నీ తోడు ఉంటే చాలు. మన ప్రేమ ఈ భూమి మీద మాత్రమే కాదు, ఆ అనంతమైన విశ్వంలో కూడా ఒక నక్షత్రంలా మెరుస్తూనే ఉంటుంది.

చెప్పాల్సినవి ఇంకా ఎన్నో ఉన్నాయి. కానీ అక్షరాలు సరిపోవు.
మనం మళ్ళీ కలవాలని
ఆ వానలో తడవాలని
నీ కౌగిలిలో నేను నీ మైకంలో మునిగిపోవాలని
ఆ రోజు కోసం నేను వెయ్యి కళ్లతో నిరీక్షిస్తాను.
నిరంతరం నీ ధ్యాసలో…

నీ ప్రాణం…

మాధవి కాళ్ల..
హామీ పత్రం :⁠-
                      ఈ లేఖ నా సొంతం అని హామీ ఇస్తున్నాను..