ఒట్టుపులాకల్ వేలుకుట్టి విజయన్ (1930 జూలై 2 – 2005 మార్చి 30), సాధారణంగా ఓ. వి. విజయన్ గా సుపరిచితులు. ఈయన భారతీయ రచయిత, కార్టూనిస్ట్, ఆధునిక మలయాళ సాహిత్యంలో ముఖ్యమైన వ్యక్తి. 1969లో వెలువడిన తన తొలి నవల ఖసాకింతె ఇతిహాసం ద్వారా ఈయన ప్రసిద్ధి చెందారు. విజయన్ ఆరు నవలలు, తొమ్మిది కథా సంకలనాలు, వ్యాసాలు, జ్ఞాపకాలు, ప్రతిబింబాల తొమ్మిది సంకలనాలను రచించారు.
1930లో పాలక్కాడ్ లో జన్మించిన విజయన్, పాలక్కాడ్లోని విక్టోరియా కళాశాల నుండి పట్టభద్రులయ్యారు, మద్రాసులోని ప్రెసిడెన్సీ కళాశాల నుండి ఆంగ్ల సాహిత్యంలో మాస్టర్స్ డిగ్రీ పొందారు. ఈయన 1953లో తన మొదటి కథ “టెల్ ఫాదర్ గొన్సాల్వేస్” రాశారు. విజయన్ మొదటి నవల ఖసాకింతె ఇతిహాసం (ఖసాక్ పురాణాలు) 1969లో వెలువడింది. ఇది గొప్ప సాహిత్య విప్లవాన్ని సృష్టించింది, మలయాళ కల్పనా చరిత్రను ఖసాక్కు ముందు, ఖసాక్ తర్వాత అని రెండుగా విభజించింది. ఈయన తరువాతి రచనలైన గురుసాగరం, ప్రవాచకంతె వళి (ప్రవక్త మార్గం), తలైమురకల్ (తరాలు) ఈయనలోని పరిణతి చెందిన అతీంద్రియవాదాన్ని తెలియజేస్తాయి.
విజయన్ అనేక కథా సంపుటాలను రచించారు, ఇవి హాస్యం నుండి తాత్వికత వరకు విభిన్న పరిస్థితులను, శైలులను ప్రదర్శిస్తాయి. విజయన్ తన సొంత రచనలను మలయాళం నుండి ఆంగ్లంలోకి అనువదించారు. ఈయన ఎడిటోరియల్ కార్టూనిస్ట్గా, రాజకీయ పరిశీలకుడిగా కూడా పనిచేశారు, ది స్టేట్స్ మన్, ది హిందూ వంటి వార్తా పత్రికలలో పనిచేశారు.
ఓ. వి. విజయన్ 1930 జూలై 2న కేరళలోని పాలక్కాడ్ జిల్లా విలాయంచాతనూర్ గ్రామంలో జన్మించారు. ఏడవ నెలలో నెలలు నిండకుండానే జన్మించిన విజయన్, బాల్యం నుండి అనారోగ్యంతో ఉండేవారు, ఎక్కువ సమయం తన గదికే పరిమితమయ్యేవారు. ఈయన తండ్రి ఓ. వేలుకుట్టి అప్పటి బ్రిటిష్ ఇండియా లోని మద్రాసు ప్రావిన్స్ మలబార్ స్పెషల్ పోలీస్ అధికారి. ఈయన చెల్లెలు ఓ. వి. ఉష మలయాళ కవయిత్రి. బాల్యంలో విజయన్ ఎక్కువగా ఇంట్లోనే విద్యనభ్యసించారు. పన్నెండేళ్ల వయసులో మలబార్లోని కొట్టక్కల్ రాజా హైస్కూల్లో నేరుగా ఆరో తరగతిలో చేరడం ద్వారా ఈయన అధికారిక పాఠశాల విద్య ప్రారంభమైంది. పాలక్కాడ్ విక్టోరియా కళాశాల నుండి గ్రాడ్యుయేషన్ పూర్తి చేసి, ప్రెసిడెన్సీ కళాశాల నుండి ఆంగ్ల సాహిత్యంలో మాస్టర్స్ డిగ్రీ పొందారు. విజయన్ జర్నలిజం వైపు వెళ్లడానికి ముందు కోజికోడ్ లోని మలబార్ క్రిస్టియన్ కాలేజీ, విక్టోరియా కాలేజీలలో కొంతకాలం బోధించారు.
ఖసాకింతె ఇతిహాసం
విజయన్ మొదటి నవల ఖసాకింతె ఇతిహాసం (ఖసాక్ పురాణాలు) పూర్తి రూపానికి రావడానికి పన్నెండేళ్ల సమయం పట్టింది, ఇది 1969లో ప్రచురించబడింది. ఒక సంవత్సరం క్రితం, ఇది 1968 జనవరి 28 నుండి మాతృభూమి వారపత్రికలో 28 వారాల పాటు సీరియల్గా ప్రచురించబడింది. ఈ నవల మలయాళ కల్పనా చరిత్రలో ఒక గొప్ప మార్పును తెచ్చింది. శైలి, కంటెంట్లో అద్భుతమైన ప్రయోగాలతో ఈ నవల ఆధునికవాదానికి నాంది పలికింది. గాబ్రియేల్ గార్సియా మార్క్వెజ్ యొక్క వన్ హండ్రెడ్ ఇయర్స్ ఆఫ్ సాలిట్యూడ్ తో పోల్చబడిన ఈ నవల, ఖసాక్లోని అనధికారిక విద్యా కేంద్రంలో ఉపాధ్యాయుడైన రవి, అతని ఉనికి సంక్షోభాల గురించి వివరిస్తుంది. ఈ నవల తమిళ భాష, మలయాళంలోని పాలక్కాడ్ మాండలికాన్ని కలిపి కొత్త కవితా శైలిని పరిచయం చేసింది.
విజయన్ 1958లో ఢిల్లీ లో కార్టూనిస్ట్గా తన వృత్తిని కొనసాగించడానికి తన సొంత రాష్ట్రం విడిచి వెళ్లారు. ఢిల్లీలోని ప్రసిద్ధ ‘శంకర్స్ వీక్లీ’లో కార్టూనిస్ట్గా, రాజకీయ వ్యంగ్య రచయితగా చేరిన ఈయన, 1963లో ‘పేట్రియాట్’లో స్టాఫ్ కార్టూనిస్ట్గా చేరారు. విజయన్ వివిధ వార్తా ప్రచురణలైన ది స్టేట్స్ మన్, ది హిందూ లలో ఎడిటోరియల్ కార్టూనిస్ట్గా, రాజకీయ పరిశీలకుడిగా పనిచేశారు. ఈయన కార్టూన్లు ఫార్ ఈస్టర్న్ ఎకనామిక్ రివ్యూ, ది న్యూయార్క్ టైమ్స్ వంటి అంతర్జాతీయ ప్రచురణలలో కూడా కనిపించాయి. 1975 నాటి అత్యవసర పరిస్థితి (ఎమర్జెన్సీ) పై ఈయన చేసిన కార్టూన్ వ్యాఖ్యలు భారతీయ కార్టూన్ చరిత్రలో మైలురాళ్లుగా నిలిచిపోయాయి.
విజయన్ పార్కిన్సన్ వ్యాధితో 20 ఏళ్ల పాటు బాధపడ్డారు. 2005 మార్చి ప్రారంభంలో ఈయనను హైదరాబాద్లోని కేర్ ఆసుపత్రిలో చేర్చారు, అక్కడ 2005 మార్చి 30న 74 ఏళ్ల వయసులో అవయవ వైఫల్యంతో మరణించారు. ఈయన మృతదేహాన్ని ప్రత్యేక విమానంలో కేరళకు తరలించి, త్రిసూర్ లోని పంబడి వద్ద గల ఐవర్ మాడం శ్మశానవాటికలో పూర్తి ప్రభుత్వ లాంఛనాలతో అంత్యక్రియలు నిర్వహించారు.
మాధవి కాళ్ల
సేకరణ